Cantica

¡Eya, velar! ¡Eya, velar! ¡Eya, velar! Velat, aljama de los judios,
¡eya, velar!,
que non vos furten al Fijo de Dios.
¡Eya, velar!
Ca furtarvoslo querran,
¡eya, velar!,
Andres e Peidro et Johan.
¡Eya, velar!
Non sabedes tanto descanto,
¡eya, velar!,
que salgades de so encanto.
¡Eya, velar!
Todos son ladronciellos,
¡eya, velar!,
que assechan por los pestiellos.
¡Eya, velar!
Vuestra lengua tan palabrera,
¡eya, velar!,
havos dado mala carrera.
¡Eya, velar!
Todos son omnes plegadizos,
¡eya, velar!,
rioaduchos mescladizos.
¡Eya, velar!
Vuestra lengua sin recabdo,
¡eya, velar!,
por mal cabo vos ha echado.
¡Eya, velar!
Non sabedes tant de engano,
¡eya, velar!,
que salgades ende este ano.
¡Eya, velar!
Non sabedes tanta razon,
¡eya, velar!,
que salgades de la prision.
¡Eya, velar!
Tomaseio e Matheo,
¡eya, velar!,
de furtarlo han gran deseo.
¡Eya, velar!
El discipulo lo vendio,
¡eya, velar!,
el Maestro non lo entendio.
¡Eya, velar!
Don Philipo, Simon e Judas,
¡eya, velar!,
por furtar buscan ayudas.
¡Eya, velar!
Si lo quieren acometer,
¡eya, velar!,
¡oy es dia de parescer!
¡Eya, velar!
¡Eya, velar! ¡Eya, velar! ¡Eya, velar!